Eph 4 | WSK | STEP | Buta se ani Biya ko ura tasam bare ko ani talipara ningi baga se iwita nede ilusam: Kaem ninga auram ale diram bagaralko ninga maonam wore ko ikia tal ale diram la bagaralko.

Ephesians 4

Ana Kris alo nangamang suwanta baganakko

1 Buta se ani Biya ko ura tasam bare ko ani talipara ningi baga se iwita nede ilusam: Kaem ninga auram ale diram bagaralko ninga maonam wore ko ikia tal ale diram la bagaralko.

2 Nina ninimi ira kutuwural ale lila te bagaralko. Ikup am gialko. Ale saki ninga bita maguwumon mu nengemang nungaralko. 3 Kaem ko Korang Bur ninga nengemang suwan awuram se lila aram. Se nina munan mu ko ninguru sinar tal ale nengemang suwanta bagaralko. 4 Kris alo motam suwanta. Se Korang Bur betela suwanta. Ale betela, mel ko Kaem nanga auram se ko kimi betenakko mu suwanta. 5 Anananga Biya Jesus Kristus kota suwanta. Se nangamang ningi nunguning suwanta, se anuwa tata suwanta. 6 Se Kaem kota suwanta, nu ana suen la nanga Nainet. Nu ana suen la nanga bitarso, ale ana suen la nanga ningi baga se ura beteso.

7 Bare Kristus kota ko ikia te ana suwan suwan ikia sokel tutia nangaram, ura te betenakko. ^{▼▼Eph 4:7-13 Anananga ura kirker: Rom 12:6-8; 1 Cor 12:4-7; 12:28.} 8 Se David Kristus uwutata bitirukko mu ko iwita giram balam, “Nu kari motam biya nunga nosokel menawuram ale nup biya taukko nama tarigiram, asele munan ningo ningo kariimet nungaram,” mam.

9 Se den nu “nama tarigiram” mu awuk ta? Mu iwita: nu kuali la me nama tarigiram. Mena. Nu giram duruk wonong beteram ale ali imi te tai kaparam, asele aking peleram nama tarigiram. 10 Kari suwanta ali imi te tai kaparam borta, aking peleram am kualala biya nama tarigiram. Ale ali imi te, se kualala kuwim suen biya am nu la te bagoso.

11 Se kari borta ikia sokel tutia nangaram: nu kari sang apostle nunga balam, se sang prophet nunga balam, sang evangelist, sang pastor se kausa kari. 12 Nu ikia sokel nangaram mu ana Kris alo ura te betenak ale eng am te sokel ago baganakko. 13 Se ura imi namawuruk la, ana singir la nangamang ningi nunguning suwan aruk, se nanga ikia Kaem ko Namar ko mu betela suwan aruk, se ana Kristus turan la kariimet nunguning ko aratanakko. ^{▼▼Eph 4:13,15 Ana Kristus turan la kariimet nunguning ko aratanakko: Col 1:28.}

14 Se tom mu te ana kuriang gotektek iwita ko me baganakko. Se kawel kari sang nanga kulurmonko negemon bare ana nononga den me karo tunakko. Se nononga den umu gagi dal sapara iwita me nanga sapuruk siruwurokko. Ale daula dal ituguso se koma ngual ngual beteso namoso iwita me nanga bitirukko. 15 Mena. Ana nainimi ko kua se den nunguning la balnakko. Ale nanga Supuling Biya Kristus turantala kariimet nunguning ko aratanakko. 16 Nangimik guang iwitatala, bare ko nuamur tutuk suen biya wore te numi atumukira se te ura tasan iwitata, ana Kris alo namake namake nanga ura ilu se, nainimi sangaru se, nainimi ko kua se, mu te ana sokel ago la baganakko.

Ana bagara iru wore te baganakko

17 Se ani Kari Biya ko nup te iwita nede ilusam: nina udagi me ikia alo nunga munan te me geragalko. Nuna mel yam yam ko la ikia tasan. 18 Nononga ikia mu tiromorom karogo. Nongomang aora biya, se ikia mena. Buta se Kaem ko marak nunguning nongote mena. 19 Nuna dolara bo nongote mena, se nuna kilek memek ko munan ningi nama naguman, ale memek duap duap bitawasan.

20 Bare nina mu Kristus munan bo uwuta me ninga kausam. 21 Nina Kristus ko dugu duap ikiman, se den nunguning Kristus kote aniso mu nuna ninga kasurman tala. 22 Buta se ikia munan memek ulengkala ninga diruwuwakaso mu patawu saparalko. Ikia memek, nemetam nengemang barasa, mu ninga maguwurok silaturukko negakaso. 23 Se patawu saparal se ninga nengemang motam, ninga ikia, mu iru aratukko. 24 Kaem kariimet iru ko ninga beteram. Buta se nina kariimet iru aratal ale, Kaem bagoso iwitatala, diram kako nunguningkiri bagaralko.

25 Ninimi den kawel maona saparalko, ale den nunguning la balalko. Mu awuk, ana suen la Kristus te motam suwanta. 26 Se nengemang maguruk agi mu, sinar talko, nina memek beteral bore ko. Se nengemang magawuruk la worem me nama kapurukko, 27 nina Satan ko lage korang kaogal se te utu nagurok bore ko.

28 Se kari mel tere naso, mu udagi me tere naukko. Mena. Nu ura taukko, ale noko ura te mel aratuk se sang kari nungumik mel mena mu nungarukko. 29 Den memek nigiring te me aratukko. Den ningo kariimet nongomang motam welang tuok ale nunga tagi patawurukko mu la balal ale te sangam nungaralko.

30 Nina Kaem ko Korang Bur me ikup tualko. Mu Kaem ko Korang Bur ningaram ale te nina noko ninga balam. Se nina ikiman, nu ninga giok se ilak bagaralko tom mu tai aratukkowo.

31 Nina kilek memek imi me beteralko: nengemang magara ale me nunga, bo alis tuata, dolara den maona, bo balu kutuwu lagara, kilek memek uwutata mu nibiring tualko. Ale launuria munan yawara bita se, ninimi nengemang tualko. Kaem Kristus te nenenga memek siwu ningaram turantala, ninimi ko memek siwuralko.

32